قصائد وشيلات لبعض شعراء قبيلة حرب ابتهاجاً بمناسبة خبر عتق خالد العلوي - صحيفة حرب الإعلامية

صحيفة حرب الإعلامية إعلام متخصص وتطلع منظم لخدمة القبيلة الخميس 10 شعبان 1439 / 26 أبريل 2018
جديد الأخبار تعيين الاعلامي خليل الصاعدي مديراً لإدارة المذيعين بقناة الإخبارية «» تعيين الاعلامي بندر حجاج العلوي مشرفا على الشعر والشيلات بقناة الصحراء «» إعلان نتائج جائزة رابغ للأداء التعليمي المتميّز بحضور محافظ رابغ الشيخ ايمن بن مبيريك «» «صحة القريات» تكرم منسوبيها بحضور مدير صحة القريات الاستاذ عبدالرحمن دبي السليمي «» الكاتب محمد البلادي : زميلنا طُرِد من المدرسة فأصبح من أثرياء المملكة «» ترقية الدكتور عبدالرحمن علي الحازمي إلى رتبة أستاذ مشارك بجامعة جدة «» محافظ خليص د. فيصل الحازمي يستعرض مع هيئة تطوير منطقة مكة المخطط الإقليمي للمحافظة «» الباحث التربوي الدكتور حميد محمد الأحمدي يشارك في لقاء بعنوان “الشباب والأمن الفكري " «» تعليم المدينة يكرم الاستاذ خالد عايد الأحمدي «» سفير خادم الحرمين الشريفين بـ تركيا يدشن معرض مشروع الشيخ عبدالله معيلي السهلي «»
جديد المقالات 28 عاماً على هابل «» المسؤول عن نحر أولئك البريئات؟! «» مستقبل المؤسسات الصغيرة والمتوسطة «» أوجع الكلاب ..!! «» الغش التجاري والنفخ في الرماد «» الرجل الذي كور الأرض «» قبيلة حرب .. وواجباتها «» حتى لو اضطررت لإخراجه من المدرسة «» قديد قرية سياحية أثرية «» المدينة النبوية عاصِـمَـة لِــبِــرّ الـوَالِــدَيْـن «»




الأخبار مناسبات وتهاني › قصائد وشيلات لبعض شعراء قبيلة حرب ابتهاجاً بمناسبة خبر عتق خالد العلوي
قصائد وشيلات لبعض شعراء قبيلة حرب ابتهاجاً بمناسبة خبر عتق خالد العلوي
قصائد وشيلات لبعض شعراء  قبيلة حرب  ابتهاجاً بمناسبة خبر عتق خالد العلوي


( صحيفة حرب الإعلامية ) : تفاعل بعض شعراء القبيلة مع خبر إعتاق خالد بن هزاع العلوي الحربي وعبّرت مشاعرهم من خلال قصائدهم عن ابتهاجهم بخبر الاعتاق الذي اكتمل بعد ان دفع الشيخ صلاح الزبالي خمسة ملاييين ليكمل المبلغ المطلوب ثلاثين مليون ريال .



قصيدة الشاعر صالح بن حمود القويضي العياضي

ياام اليتيم اللي تحرا قصاصه = جاك الفرج من باب فتاح الابواب 
فكوه ربعه من الوحل يوم غاصه=حرب هل الوقفات لاكشر الناب
صاح السجين وجابو بارتقاصه= حنا هل الفزعه لمداريك الارقاب
كل وقف دون الولد باختصاصه= حسب المواقف بين عكفان الاشناب
حرص الحريص وفوتوه احتراصه= بماقف لولب علا القصد لولاب
ياحرب مال الطيب عنكم مناصه =فزعاتكم تبرد عن الكبد لهاب
طيب القبايل ماعليه انتقاصه= وكل على حقه ابوزيد وذياب
قصيدة الشاعر الشيخ منصور بن شجاع بن حبيتر البيضاني
يابنت ياللي تنثر عيونك دموع=نامي و خليها عيونٍ كحيله
خالد ظهر يابنت والراس مرفوع=قبيلتك ياويها من قبيله
قامو على شانك ولبو لك فزوع=من كل حدب و صوب ماهي قليله
قالو ثلاثينٍ، وقلنا لهم طوع=في نهجنا ما نعرف المستحيله
لا كبرت القالات و الفعل مشروع=حنا خلقنا للحمول الثقيله
حنا هل القالات و الصوت مسموع=و حنا هل الوقفات فرض و نفيله
وحنا ليا صارت بها هوش وجموع=حلو المعادي ينقلب حنظليله
حرب الحرايب والجمل قدم مدفوع=اهل الفعول المعجزات الجميله


قصيدة الشاعر الدكتور عبد المحسن بن طما الاسلمي

تباشرو ياحـرب للحمـل شيـال=يالو ثقلهـا مثـل وزن الجبالـي
ياحرب لن شلتو من الحمل الاثقال=كمل نواقصهـا صـلاح الزبالـي
ماقال ذاخرها لي أحفـاد وعيـال=من طيب نفسه تقل دافع ريالـي
كفو ياولد فريج يامرخص المـال=من دون ربعك يوم صار المجالي
راجي بها مولاه في يوم الاهـوال=حاسب جزاها من عزيز الجلالـي
يبغى يفرحنا قبـل عيـد شـوال=ابعتق خالد قبل شـوف الهلالـي
بيفرح امه جعـل تفـداه الانـذال=اللي يحوزوا مال كثـر الرمالـي
صحيح مايتسربل البخـل رجـال=ولا يعطي الجزلات غير الرجالـي
أمثال ابوصالح سلم جيـد الخـال=اللـي ليامنـه عطـى مايبالـي
عطي عبيد المال درس ن فالاموال=وسطر مثل ينقل بطـول الليالـي
هذا صلاح فريج بفعـال وأقـوال=من حرب له في حجر مجد يلالي
له مع قبيلة حرب وقفات وأفعـال=يشهد عليه القاصي ن والموالـي
حتى مع ارجال القبايل له اخصال=شرق وغرب ومن جنوب وشمالي
ابن طما سجل لك أشعار فالحـال=ساعة فزعت لحرب حال ن ومالي


قصيدة للشاعر والإعلامي رشيد بن محمد الفريدي
ياسلامي على ربعي وسام القصيد =محزمي..تاج راسي طيبهم لي قناد
كل ماسطروا للمجد علم جديد=يتقادح براسي مثل قدح الزناد
قسمهم بالمكارم جزل ماهو زهيد=واسمهم كاسبينه من ظهور الجياد
حرب وقت الشدايد راس مال ورصيد=يعتقون الاسير ويكرهون العناد
للخوي في وفاهم يشهد ابن رشيد=والبلالي لجاره راح عمره نفاد
وقصة اعتاق خالد ماوراها مزيد=شرفت للجميع وحققت للمراد
المقادير تحكم والمحابل تصيد=والقضاء والقدر بيدين رب العباد
المصايب لاصارت مابها مستفيد=من بعضها يذوب القلب لو هو جماد
اربع سنين خالد حاسبينه فقيد=وام خالد حزينه مااهتنت بالرقاد
شذرة السيف صارت قرب حبل الوريد=واصبح العيد الاول للنهايه معاد
اعتزت بأخو حسنا وصار نعم العضيد =ارتكي بالمهمه واعتلا بالشداد
اشهد ان اللهيبي في مقامه فريد=ارتكى للمهمه واعتلا بالشداد
اختصر للجدال ودوم رايه سديد=التزم بالوفاء عن حرب طير الهداد
المهمه جسيمه والهقاوي بعيد=ومهلة اعتاق خالد طول حبل القياد
وقامت جموع حرب اللي تفل الحديد=ساهموا من يبون الاجر يوم التناد
ياصلاح الزبالي عل عمرك مديد=بيض الله وجهك ياالشجيع الجواد
وقفتك يابن عمي عن قبايل زبيد=اهل وادي حجر..واهل السيوف الحداد
يوم بعض العرب للمال صاروا عبيد=رايتك يالزبالي مالحقها سواد
انت سقت البشاير بالنهار السعيد=مع طلوعك يانجم سهيل هب البراد
ابشري ياام خالد باليتيم الوحيد=فرحتك في خروجه حي صارت وكاد
افرحي واستريحي واشتري ثوب عيد=موعدك مع ظنينك قبل يوم العيإد


والقصيدة هنا شيلة اداء المنشد بدر العريمه واخراج خالد البدراني


اضغط هنا



قصيدة للشاعر معتق العياضي


الله الله يا ام خالد لا تشكين الهموم =كل عسرة في يدين الولي تيسيرها 
لا يهمك لا يهمك ترى ربعك قروم =والحمول الكايدة مالها الا بعيرها
ابشري في خالد بوقفة الربع العموم =يا عسى اليال الحزن ما يرفرف طيرها
ابشري به وافرحي يا عسى الفرحة تدوم =والملايين الله مسهلن تدبيرها
اجمعوها حرب ما كملت تسعين يوم =ولو نكمل شهر تسعة جمعنا غيرها
الفضل لله ثم لقويين العزوم=والقبائل ساهمت كثر الله خيرها
مير وقفة حرب بالفعل ما هي بالعلوم =عنصرية طيب يا اللي تبي تفسيرها
اسم حرب كفاية انه يوصلك النجوم =حرب سلم وحرب و الحرب ينقر زيره
ا


قصيدة للشاعر جبر الزبالي

ياحرب ياهل المعجزات الجزالي =في وقتنا الماضي وفي وقته اللحين
افعالكم تشهد عليها الليالي=ويشهد بها كل الرجال المتاقين
مثل نويشي مع دخيل البلالي=مواقفن للفعل فيها براهين
واليوم فالموقف صلاح الزبالي=دون رقبة خالد يسوق الملايين
عساه يسلم من صدوف الليالي=ويطول عمره ياعرب قولو امين
يامسندي يامكسبي راس مالي=فعلك يخلد للعرب بالدواوين



قصيدة للشاعر علي بن عبيد الحصني :


يا اهل المدايح ترا ما كل مدحٍ مبـاح=توقعـوا بالمدايـح يـا مـلَ العافيـه
لاتمدحون الشيوخ اهل الكفوف الشحاح=شيخه بلا فعل ما تذكر بلا اوصافيـه
اللي لياجاء لزومه قالـو الشيـخ راح=جرت ضعونه عليها تسفـي السافيـه
لاصار مـا تاجـده لاولـدنّ القـاح=سوات بيض الصعو يذكر ولايشافيـه
المدح يستاهله مثل الزبالـي صـلاح=راع النقاء والشرف والمـده الوافيـه
اضفى على صدور ربعه قمة الانشراح=عساه يلقى جزاها فـراش والحافيـه
ما قلتها منه ابي لي بشت ولا سـلاح=شهادة الحـق تطلـع راس مشرافيـه
قلته وهاذي مشاعر هاجسي يوم فـاح=مسؤول عن ما نطقت ونيتي صافيـه



قصيدة بلسان خالد هزاع العلوي للشاعر نافع بن هجاج بن قيران العلوي
انشر البيضاء على عالي المباني = يوم ربعي للنداء هبوا سويه
ياقبيله حرب ياحرب ومعني =ياقبيله حرب ياحربن قويه
كل حربي يوم جاه العلم جاني =ارخصوا المال من شان القضيه
ياصحيفه حرب خوذي من لساني =وانشري فزعات ربعي والحميه
والسفينه قادها الفرم و حماني =واحتماني من بلى شر الاذيه
شيخ شمل ولو تنسوا مانساني =مقدم الفريس وعزومه قويه
سجل التاريخ في ماض الزماني =واسئل الفريش عن حرب الابيه
يوم سيف ورمح وحصان وعناني =حملت الباشات مانامت هنيه


قصيدة للشاعر خالد بن حسين الزبالي
يابن فريج الطيبه من نصيبك=ماهي غريبه والمواقف لأهلها
كل الحمول الكايده ماتكيدك=قلت ابشروا ياحرب وانا جملها
في كل مجلس والرجال تحكيبك=اعتقت خالد والنفوس بعملها
الله يابن عمي عليها يثيبك=في جنت الفردوس مع من نزلها
لي الفخر يوم افتخر وأعتز يبك=ذخر الزبالي والمهمه بطلها
يانصع كلن فالقسا يلتويبك=شامخ على كل الجبال وسهلها
شرفت حرب وكل حربي بطيبك=مدات جودك منهو اللي فعلها


قصيدة للشاعر فالح بن جريبه العلوي

يقول فالح عقب ما أقعد راسه = شهرين في فكره سطى هوجاسه
يطب بحر الشعر يعرف لوله =يغوص و إلكم يجلب الألماسه
الحمد للي معتلي في كونه =رب العباد و فارق ن بأجناسه
الشكر له و الحمد في كل حزه =يسر لنا فعل ن طوانا ياسه
خالد بسجنه شاب و إهو صغير =هم ن غدى زاده و هم إلباسه
إصروف وقته ميلن بالكفة =و زاد مع نقص الليالي باسه
لا ما قنط من رحمة اللي فوقه =يوم إن غيره زايد ن وسواسه
تنازلوا عنه بمال ن وافر =و الدم كثر المال ساس إفلاسه
عشرين مليون ن حمول ن تطغى =مع عشر فيها شيب والله راسه
لين افزعوا راعين طيب و فزعة =و الطيب والمعروف يعرف ناسه
بني علي ربعي ملاذ العاني =إي والله إنهم عزه و نوماسه
و من كل لابة قدروا عنوتنا =إصغار و إكبار و رجال إرياسه
بيضاء لهم نرفع على المتعلي =يا رعود في كبد السماء رجاسه
تسهلت من عقب ما هي صعبة =تجمعت في فترة ن حساسه
تفرجت و الله عقب الشدة =حظ ن كتب ذعذع لنا نسناسه
خالد كتب له عمر في هالدنيا =ابن الدهيم اللي عريب ن ساسه
أدعي عسى دنياه ما تنشب له =تضحك بوجهه ما تزيد عباسه
رجل ن يعزه دام ربي عزه =و رجل استغله ما تدوم أنفاسه


قصيدة للشاعر متعب بن خصيوي المحمادي
بيض الله وجه ربعي حرب سكان المدينه= والحروب اللي جنوب المملكة لأقصى الشمالي
ومن جهة الشرق لأقصى السيف واللي ساكنيه=افزعوا من شأن خالد وارخصوله كل غال
انتخاهم بندر بن الفرم وقالوله في حينه =كلنا ربعك وتبشر بالسعد في كل حالي
مادريت أنا الحروب وكل علم حاسبينه =حرب ربعك فالمواقف مثل ماصم الجبالي
ماتغيرنا الرياح تهب وتعقبها السكينه =ولاتزلزنا الرعود اللي تلجلج فالخيالي
وافزعوا والكل قدم كل ماتملك يمينه =ماتوانا في لزومه ولاتعذر بإتصالي
وفي خلال أيام والمطلوب لأجله جامعينه =واكتمل عد الدراهم والمقرر في ليالي
وفكوا اسر الحربي اللي ظل له مده رهينه =مال احد منه عليهم كود للمولى الجلالي
من شيمنا من تلفت كود للحاجة الثمينه = والرخيصه مالها في سوق ربعي لومجالي
نصنع المعروف ماننشد عنه ونقول وينه= فالبحر نرميه مانبغى جزاه من الرجالي@
والقبائل شاهده والعلم هذا خابرينه=مثل ماقصة نويشي مع دخيل بن البلالي@
قصتين احداثها مامثلها قصه قرينه=جسدة حق الخوي وجسدةأسمى المعالي@
فعلنا يشهدله التاريخ من ماضي سنينه=والقبائل كلها والنعم في ماضي وتالي
افتخرفي ربعي اللي كل علم مدركينه=بالوفاء والطيب والمعروف والنهج العدالي
والرجل يمدح لفعله والرجل يمدح لدينه= واكسبوها ربعي الثنتين قول بلاجدالي
وفالختام اقول قول الصدق ياللي سامعينه=قول حربي شاش رأسه عقب ماجاله مجالي
بيض الله وجهكم يالفرم ياراع السمينه= وبيض الله وجه راع الصيت صلاح الزبالي ...



قصيده الشاعر شجاع غربي الدشن الحربي

زان جرك ياللحون السامريه=والقصيده زأن للشاعر بناهأ
الوفا معروف للناس الوفيه=وحق للحربي ليا قام.يتباها
قبل عيد الفطر ومن قبل الضحيه=ام خالد عيدت واعتق ضناها
ماهو مستغرب من رجأل الحميه =عادت الحربي لاوقف ماثناها
بالعصور التاليه والاوليه=بالكرم والعز ممطرتن سماها
شر والا خير كلنا سويه=يجبال راسيه يذري ذراها
يوم خالد بين شمس وبين فيه=مبتحل من موتها والا حياها
جأتك اللي تدبل الميه بميه=تدفع اللي قدمها وااللي وراها
حرب ياربعي مزبنت الونيه=معتلين الصيت ولاحدن شناها
دأيم بالجزلات ماجبتم رديه=حضها مرفوع ومزين لغاها
وبمر رب البيت حلت القضيه=وسجلت وقف شرف محدن نساها

للشاعر / متعب بن عويض المشيعلي الحربي


يفداك ياخالد ثلاثين مليون =أبشر بعزك ياكريم السبالي 
ربعك قبيلة حرب والناس يدرون =تعرف مواقفهم من أول وتالي
ماهم مخلينك ورى الباب مسجون =مافيه عذر ولا على الروح غالي
وقت الرخا كلن غناوي وممنون=ووقت اللوازم يظهرون الرجالي
تبين اللي للمدايح يحوشون=صحيح تبرك للحمول الجمالي
شالوا ثقيل الحمل بعضود ومتون =وخمسة ملايينً دفعها الزبالي
وقفوا معك لعلهم مايعجزون=الله يكافيهم صدوف الليالي
قبيلةً ماتقبل النقص والهون=ترسي كما ترسي طوال الجبالي
المعجزات لحرب وإبليس ملعون=هاذي حقيقة ماعليها جدال
لنا فعول وغيرنا مايهونون=كلن على حقه وسيع المجالي
تمت بذكر اللي له الخلق يرجون=الواحد الوالي على كل والي
وصلوا على اللي بالهدى نور الكون=نور أمته بعد الجهل والضلالي


قصيدة للشاعر / جازي بن جزاء المويعزي الحربي
شيلة بصوت / عوض البيضاني الحربي


للمشاهدة أضغط هنا



poem]


قصيدة للشاعر سعد بن نفاع الجابري


شكر وتقدير وتحـيـه لكل الجـماعـات=تحـية وفا وكـل علوم الوفاء فـيها
أهـديـها لـو كانـت ملـيار من تحـيـات=لربعي من صـميـم قلبي أهـديهـا
أهـل الوفاء لو صارن العلوم صعـبات=قـبـيـلـتي عـزوتـي وأفـتخر فـيـها
تـاريـخهـم حـافـل من دوح واحـات=كـنـوزه معــجــزاتٍ فـي مخـابـيـهـا
للخـوي والجار قـدمـوا كـل طـالات=ولـلـضـيـف بـيـوتـهـم شيدوا مبانيها
قديم علومهم مابها عـثر(ن) وهــفـَوات=بيض(ن) تشهد لها البيض في معاليها
واليوم جديدها فك خالد من سيف جزات=اليتيم اللي ما اهتنت أمه بنوم لياليها
تعد أيامه سنين وشهور(ن) وساعات=غير الترجي مالها حيلة(ن) تلتجيها
بثلاثين مليون صارت احمولها ثقيلات=تصادم رجاها واحباطها في مساعيها
لكن بفضل الله ثم بفضل الوجيه الفليحات=جابوها ثلاثين مليون ماتواخلوا فيها
هذا طبع حرب ربعي لياجات نخوات=دون لزومهم جبال(ن) ماتنزح رواسيها


قصيدة للشاعر والكاتب عبد المطلوب بن مبارك البدراني
بديت باسم الخالق الرزاق عــــلام الغيـــوب=اللي رحم عبده عظيم الشان فــــارج كربتــه
يعلم دبيب النمل بالظلماء وما وسط القلــوب=هو ملتجا للعبــــد لاضاقت سمـــاه وتربتــه
له التجينا وانتخينا وهو فـــراج الكـــروب=يفرج لخالد من غياهيب السجون وغربتـــــــه
والحمد لله قاضي الحاجات غفـــار الذنـــــوب=فـرّج لخالد وأفرحت من شأنـــه أم ربتـــــه
والنعم والله بالقبيــلة كلها وإن صـــار نوب=دون اللوازم وإن بدا الماجــوب قامـــت سدته
الشيخ بندر من شيوخ العز للعليـــاء كســوب=وصلاح ولد فريج شيخٍ زايـــــــده معـــــزته
والنعم والله يارجال العز يا شيــــوخ الحروب=انتم حزام اللي مقادير الليـــالي ضدتـــــه
يـــاكم ثنيتوا بالحرايب كانها شبـــت شبوب=وقت الزمان اللي مضى والكل شاهر حربتـــــه
تاريخنا معروف من عصرالاوايل ومحســــــــوب=تاريخ ناصع بالبياض اهل المواقف عدتــــــه
وكل القبايل والنعم بالشرق والا بالغــــروب=لطيب ما يقصرعن اهل الطيب وان جت حزتــــه
واليوم في عهد المليك العدل للشعب محبـــوب=عبدالله اللي كــــل شــعبه شايــــلٍ مودتــه
ابن الزعيم اللي حكمها من شمال الى الجنوب=واضفا الامن شرق وغرب صــقر عطيبه هدتـــــه
وبعده عيال كلهم وافين ما فيـــهم عيـــوب=مشــــوا على نهج الامام ونفــذوا وصيتـــــه
يــا الله تحفظ دارنا في كل شبر وكل صـــــوب=واحفظ لنا قائد وطنا اللي جزال مدتـــــــه
وولي عهد المملكة من فعله القاسي يـــــذوب=سلمان وجه الخير وسط قلوبنـــا محلتــــــه
وختامها صلاة ربي عد ما هبـــت هبـــــــوب=على نبي وضّح الاسلام كامــــل لامتــــــــــه



قصيدة مهداه للشيخ صلاح بن فريج الزبالي الحربي من الشاعر سعد بن رجاء الحصني الحربي


أستمع للقصيدة بصوت الشاعر هنا





قصيدة للشاعر سلوم جبريل الزبالي :

الهاجس اللي مرني واشغل البال= صار يتلعبي يمين وشمالي
ماكنه الا لحضرتي مرسل ارسال= يجري معي في كل يوم اتصالي
قمت اتنقاله جز يلات الامثال =حتي يجي في ذكرياتي مثالي
للخيل خياله وللموقف رجال= يوم إن الاقصى يدرق بالموالي
كلن بربعه يفتخر مابهاجدال =وانا أتشرف وافتخر بالزبالي
وقت القا مانحسب المال= والحال ندهم كبيرات الفتن مانبالي
ميقافنا نحماه في سلم وقتال= ولا همنا فالوقت سلم وقتالي
دايم لنا في قمت المجد منزال =والبيرق اللي نرفعه فالمعالي
يبقى على العليامكانه ولا يزال= إلا اذا الدنيا يجيهاالزوالي
نعلا ولا يُعلا علينابالافعال= اكود خالقنا عزيز الجلالي
هذي حقايق سجلت باسم الا بطال =حنا هل الفزعات واهل المعالي
اقرب مثل لنعدت افعال واقوال =موقف يشرف من صلاح الزبالي
من دون ربعه يدفع الحال والمال= يرخص جزيل المال ماقال غالي
انا اشهد انه فزعته تحيي آمال =وتبني بيوت مشيده بالظلالي
من حكم رايه للصعوبات حلاٌل= راي السعد منه الوفا والكمالي


قصيدة للشاعر متعب بن علي بن سعود العفيش العلوي :
دام القبيلة وقفت فابشر بخير=باذن الولي انك تنور سمانا
لاجلك مشينا يالبناخي طوابير=حنا حروب ما نهاب اخصمانا
من دون (خالد) ما نبي اي تبرير=افرح تراك اليوم باقي معانا
الله يبيض وجهكم يـ المناعير=فزعة شرف يوم (الدهيمي) نخانا
اي و الله افرح بالرجال المشاهير=اللي بطيب افعالها بـ تحمانا
يا حرب لا هنتو من كبير لـ صغير=ياهل الثلاث اللي شهدها الزمانا
و يا خالد افرح دام سقنا التباشير=للي لها اعوام ما هي معانا
الزول معنا و العقل فيه تفكير=للي ورى البيبان يرجي حنانا
و صحيح من له عزوتن كنها(النير)=يبشر بطيب الفال زوده امانا


شيلة للفنان عابد البلادي من كلمات الشاعر أحمد حمد البلادي


اضغط هنا



قصيدة للشاعر عبد العزيز بن فيصل بن رضيمان الوهبي
يابدر والله حرب في كل الاوقات=حاضر بحاضر والمواقيف تحكم
كفو كفو ياحرب وقت المهمات=ياالابتن وقت المهمه تقدم
وان قالها الله والصعيبه سهالات=تقدم وبإذن الله ماهي بتهزم
حربن ليا جات المواقف عنيدات =تجيب علمن يثلج الصدر والدم
البارحه خالد همومه عسيرات=واليوم فرحة خالد ابحلم او علم
مبروك يام خالد ومافات كد مات=مبروك قلته من فرح ماتوهم
عساء السعادة بينكم مالها اوقات=في كل حزة بينهم دايم تعم
فعلك ياخالد شامخن بالطويلات =دليل وقفة ربعك وزالت الهم
ماقلت قولن غير قولن له اثبات=فكوه ربعن بالمواقف تحيزم
والخاتمه ماخاب يابدر هقوات =هقوات امه بعد مالله يرحم



قصيدة للشاعر فارس بن معيوض الزبالي

ياطير رفرف بالجناحين ياطير = وارقى بتغريدك على كل قمه
أرقى جبال اطويق واطلع على النير = وبشر جميع الي خبرنا يهمه
ما عاد في الموقف تجوز المعاذير = ذيع الخبر بين العرب لا تصمه
قول الحروب أهل الوجيه المسافير =فكو ولدهم يوم جاءت المطمه
قاموا وفزوكل ابوهم طوابير = وكلن يشمر عن ذراعيه كمه
تكاتفو واستفزعو فاعل الخير = الي لياء جاء علم كايد يتمه
وقام الزبالي جعلها له تسافير = وقال ابشرو والمال ماهو مهمه
كفو ياولد فريج ذخر المناعير = كفو كفو في كل وجه ويمه
يستهل الطاله طويل الاشابير = ياكم سجين بفعله الخير عمه
وياطير علم روق كسابت الخير = الي ترد بفعالها كل جمه
حنا لهم وهمه لنا صبح وعصير = سواء سواء والي يعادي نذمه
والحمدلله يوم صارت تياسير = وعمت تباشير الفرح كل الامه
ياطير رفرف بالجناحين ياطير = وارقى بتغريدك على كل قمه
من شأن خالد مانحسب المخاسير = يفداها كل المال ونزيح همه

قصيدة للشاعر حمدي بن ماطر العوفي



القصه أكبر من الشعر وطواريقه=وأكبر من اللي يفسرها ويقراها
المطلب اللي منول صعب تحقيقه=قبيلتي حرب حققته وانا افداها
من يوم صرح ولد محسن بتعليقه=عبر الصحف بسمه الاخبار مبداها
قال أزهلوها وأنا بندر عن الضيقه=أم الولد بشروها ( شبلها جاها )
بأذن الولي لطلقه وحذفمسابيقه=ماينطح الكايده من خاف بلواها
وتكفل ابما طلب .. ماقال ماطيقه=هبد لها الفرم صدره ثم تبناها
وقام اللهيبي معه يعلن مواثيقه=والفزعه اللي براسه طاب مسعاها
قرمن لفعل المراجل فيه تسبيقه =من روس عوف اللي تنومس حماياها
وتكاتفو كل حرب بدون تفريقه=سالم ومسروح قامت تمطر ايداها
تجمعو ووقفو غربن وتشريقه=وكلن ربوعه على الفزعات ينخاها
ولاهو غريب الوفا حنا معاميقه=ربعي هل الطيب معروفه سواياها
قومن لهم في سما الامجاد تحليقه=وفي مطلب العز دايم توصي أبناها
ماقصرو جابو المال بصناديقه=وكلن ظروفه لجل خالد تحداها
ومعهم هل الخير من شتى مخاليقه=تفاعلو والمواقف مانسيناها
ويوم جمعو مبلغن باقي لتغليقه=وقامت ليالي زمنا تسرع اخطاها
وقف لها اللي عسى المعبود مايعيقه=ثم مده له مدتن محدن تهقواها
خمسة ملايين لهل المال توهيقه=عنها شيوخ الدول تقصر عطاياها
الشيك تله وشك أسمه وتصديقه=وقال أصرفوها وان أحتجتو دبلناها
يبغى جزاها من المولى وتوفيقه=ربن عباده بفعل الخير يجزاها
هذا صلاح الزبالي جاك تحقيقه = النعم غصبن خذاها ماتمناها
حرب اتفاخر بطرياه وملاحيقه =وأسمه على صفحة التاريخ يزهاها
في عتق الارقاب ماننسا معاتيقه=كمل دية خالد وفي فعله أنهاها
وتباشرو حرب بالخير وتشاريقه=وأدنا العرب قامت تبشربه أقصاها
و تهنت أم الولد بموادع الضيقه=وخالد تهنى بشوف أمه وناداها


قصيدة للشاعر هابس بن عبدالله العلوي :

الشــكــــر للمعبود مـحــصي عباااادهـــ = المطلّع بالخافيه والشـــــــهيـــــــدي 
اللي له نصــلي بنطق الشـــهـــاااادهــ =نرجي ونخشــى من نهااار الوعيدي
في ظـــــل ابومتعب تعيش القياااااادهـ =وخيرااات ربي كـــل يوم ٍ تـــــزيدي
وفي ظل ســلمان الســعد والرياااااادهـ =ســلمــان ياكحيلان رايه ســـــديدي
ومن بعدهــا خـــالـــد تحقق مرااااادهـ =جاله مـــــن المعـبـود عـمـرٍ جديدي
واللي ســعى لاجله وبااان اجــتهــادهـ =بــجـنااان رب البيت ينعــم ســـعيدي
ســـاهم وحقق للجميع الســـعااااااادهــ =عـســاهــ لـلجـنـه بــعــمـــر ٍ مديدي
عن لابتي حرب الوفـــا والجــــلاااادهـ =حبيت اشــارك فـي مشــاعر قصيدي
الفرم وصاني وجبت اعتــمــاااااااادهــ =شــكــــر جميع الناااس قرب وبعيدي
جمع الديه باســلوب جت بالركـااادهــ =وقــــــام بنهايتها صــــلا ح الزبيدي
والشـــكر لمعبود محصــــي عبااادهــ =المطلّـــــّــــع بالخافــيـه والـشهـيـدي



قصيدة للشاعر مقبل بن مساعد المعبدي ( يوتيوب )



اضغط هنا




( من كان لدية قصيدة في هذه المناسبة فنرجوا تزويدنا بها عبر ارسالها على البريد عبر ايقونة راسلنا )

|


محتويات مشابهة

الاكثر مشاهدةً

تعليقات الفيس بوك


التعليقات
2860 Saudi Arabia "دفانة الركبة"
صح الله لسان شعار حرب تكاتف افراد القبيلة اشد مكسب بعد عتق خالد

اسم حرب كفاية انه يوصلك النجوم

حرب سلم وحرب و الحرب ينقر زيره


2873 Saudi Arabia "حربي والوفا دربي"
]اشهد ان اللهيبي في مقامه فريد

ارتكى للمهمه واعتلا بالشداد

نعم الرجل عبدالرزاق المنور اللهيبي كان احد الرجال الذين سعوا كثيراا في الافراج عن ابنه خالد العلوي وكان اكثر من حرك تلك الهاله الاعلاميه جعلها الله في موازين حسناته

ونعم في جميع ابناء قبيلة حرب كافه ولجميع اهل الخير


2874 Saudi Arabia "سعود المخلفي"
بيض الله وجيه ربعي وعساكم على القوه اليوم ودوم


3075 Saudi Arabia "حربي والوفا دربي"
كل الشعرا وفو وكفو
رشيد الفريدي جسد صور شعريه ممتازه جدا


3082 "ابن شامان"
بيض الله وجيهكم والله ونعم يلابتي حرب اشهد بالله انكم كفيتم ووفيتم ولاهو غريب عليكم وصح السنتكم


3117 Saudi Arabia "ولد وهب"
كفو كفو ياحرب وقت المهمات
شيلة للشاعر عبدالعزيز بن فيصل بن رضيمان الوهبي

http://m.youtube.com/watch?feature=m-ch-vid&v=ZRYtgpsdz6E http://m.youtube.com/watch?feature=m-ch-vid&v=ZRYtgpsdz6E


3168 Saudi Arabia "فيصل الحويمضي"
كفووووو ربعي حرب ويستاهل خالد



تقييم
1.02/10 (23 صوت)

جديد المقالات

تابعنا على الفيس بوك
تابعنا على تـويـتـر
كافة الحقوق محفوظة لـ www.harb10.com © 1439
التطوير والدعم بواسطة :WEBQNNA NET
Powered by Dimofinf cms Version 3.0.0
Copyright© Dimensions Of Information Inc.